MU IEŽAN RUMAŠ-applikašuvnna jurdda lea álgooahppun rupmaša birra nu árrat go vejolaš. Applikašuvdna galggašii oahpahit ja veahkehit máná gelbbolašvuođa ja áddejumi sihke iežas ja earáid rupmaša birra. Go mánát máhttet rumašdoahpagiid ja dovdet rupmaša, de mánát ovdánahttet nanu rumašlaš iešdovddu ja eaiggátvuođadovddu iežaset rupmašii. Dat sáhttá leat maid ávkin eastadit seksuálalaš illásteami. Deattuhan ahte applikašuvnnas ii leat seksuálalaš illásteapmi fáddán, muhto rumaš. Jus mánáidgárdi dárbbaša eanet dieđuid seksuálalaš illásteami dahje loavkašuhttima birra, de sáhttá mánáidgárdi váldit oktavuođa earret eará politiijaiguin, Bufetáhtain dahje juo Stáhta mánáidviesuin.
Háliidan namuhit ahte Stáhta mánáidviessu lea ráhkadan sihke giehtagirjji ja ovcci rumaškoartta, mas leat rumašnjuolggadusat. Dát leat veahkkeneavvut rávisolbmuide mo sáhttet váldit vuolggasaji rumašnjuolggadusain go ságastallet mánáiguin rupmaša ja rájiid birra. Sihke giehtagirjji ja rumaškoarttaid sáhttá nuvttá čálihit neahttasiiddus statensbarnehus.no. Mun ávžžuhan buot ásahusaid geat barget mánáiguin ja maiddái váhnemiid háhkat alcceseaset dehálaš ja ávkkálaš dieđuid ja rumaškoarttaid.
Applikašuvnna oahppanulbmil lea maiddái mánáid fuomášuhttit árvvusatnit iežaset rupmaša nu mo dat lea, muhto maiddái máná oahpahit dohkkehit earáid nu mo sii leat riegádan. Dát bealit sáhttet nannet máná iešdovddu mearridit iežas rupmaša badjel. Lea dehálaš mánnái oahpahit ahte son lea buorre nu mo son lea riegáduvvon ja ahte sus lea árvu.
Danne lea dehálaš ahte mánát árrat ohppet rupmaša birra, ožžot iešdovddu ja ahte sis lea gálga dohkkehit earáid nu mo sii leat. Mii leat riegáduvvon iešguđetlágánin ja mii leat nu mo mii leat. Iešdovdu, dohkkeheapmi ja árvvusatnin leat dehálaš iešvuođat eallima hástalusaide, muhto maiddái buriid oktavuođaid hukset earáide.
Oahpat áinnas mánnái dán motto: Mu rumaš lea mu iežan ja mun mearridan!
Ja don guhte leat ollesolmmoš, galggat muitit:
• Oainne buot mánáid, dohkket ja leage buorre mánnái nu mo son lea!
• Astta máná guldalit ja oaidnit, vaikke mánná sáhttá geavahit eará sániid go don ja jáhke mánnái!
• Ale goassege hilggo máná, ja váldde máná sániid ja rumašgiela duođalaččat!
• Leage dan mađe duostil ahte válddát ovddasvástádusa go vuohtát dahje dieđát ahte mánás ii leat buorre dilli! Ane muittus ahte mánáin leat iešguđetlágán ruovttut ja bohtet mánáidgárdái iešguđetlágán vásáhusaiguin.
Dáiguin daguiguin ráhkadat juohke mánnái buori psykososiála mánáidgárdeárgabeaivvi, mii fas addá mánnái buori ja ilolaš ovdáneami!
Dehálaš!
Dán fáttá bargobihtáid čađaheapmi galgá dáhpáhuvvat ságastallama bokte ollesolbmo doarjagiin, rávvemiin ja vehkiin, muhto dat gáibiduvvo ahte bargi lea ráhkkanan bures ovdal go mánáiguin bargá applikašuvnna fáttá.
Vuollelis oainnát muhtin ávkkálaš gálduid ja liŋkkaid rumašoahppamii.